了解另一半，永遠係感情增長嘅基礎。
唔夠了解嘅話，甚至會鬧交或者製造其他問題。
最近打算買對情侶戒指畀女朋友嘅時候，我發覺自己幾咁差勁，當個職員問我：「你女朋友手指個Size係幾多？」
佢都未等我答，已經由我僵硬嘅面部表情睇得出，我根本唔知⋯⋯
職員專業解答：「大部分女仔都係呢隻Size，如果你女朋友唔係特別瘦或者特別肥。」
我鬆一口氣：「哦⋯好⋯唔該晒。」
結果，隻戒指當然係唔啱女朋友Size，佢手指比「普通Size」肥少少⋯⋯
我即刻心諗：「如果第時求婚戒指都揀錯Size就死⋯⋯」
所以，除咗鍾意食啲咩、紀念日、生日係幾時，有啲個人資料／喜好，係必須要知同有實際需要。
男朋友要知女朋友嘅鞋呎寸、戒指呎寸、近視度數（有時幫女友買Con）、最緊要係知佢大約幾時M到⋯⋯前幾日小心唔好激佢、叫定佢唔好食生冷嘢⋯⋯等等。
而女朋友要知自己男友撐邊隊波，幾時要去睇波，鍾意邊啲歌手／動漫，最緊要係每個男人都需要私人時間（打下機，同FD吹水、靜靜哋諗下嘢)，妳識做唔打擾佢⋯⋯等等。
不過，以上所有要互相了解嘅事，都係為咗了解一樣嘢－『點樣令對方開心』。
你／妳，夠了解嗎？
Search